Árinu eldri

 

það er nú nokkuð öruggt að maður verður með hverju árinu einu ári eldri. Ég er þá formlega núna komin á fertugsaldurinn. Í fyrra gat maður réttlætt 30 árin með því að það væri ekki fyrr en maður væri orðinn 31 árs að hugtakið "fertugsaldurinn" ætti við - nú er bara ekki hægt að forðast það.

En ótrúlegt en satt þá hefur aldurinn engin neikvæð áhrif á mig. Ég er næstum búin að ná mínum markmiðum í bili. Ég á mann, íbúð, barn og kláraði háskólagráðuna mína og er hætt að vera feit. Næsta skref er að eignast stærri íbúð í sérbýli / raðhús / einbýlishús, 2 jeppa, fleiri börn og vinnu sem er þannig að maður ber mikla ábyrgð, hefur mannaforráð, allir líta upp til manns en vinnutíminn er frá 8-14 og aldrei þörf á yfirvinnu eða helgarvinnu. Þess má geta að það eru ekki komin tímamörk á þessi markmið :-).

Afmælisdagurinn í gær var með besta móti. Ég fékk endalausa kossa frá fjölskyldunni minni fallegu, og svo líka frá mínu yndislega samstarfsfólki, mamma bakaði fyrir mig köku sem sló í gegn. Vorum boðin í mat til mömmu og pabba (innbökuð svínalund og humarsúpa) og fengum svo Atla og Freydísi í heimsókn. Ég fékk fullt af pökkum sem skemmir nú aldrei. Kvöldið var svo endað á ælupest sem var í boði Emmu Guðrúnar.

Í kvöld ætla ég svo að fá vinkonu-gellurnar mínar í mat og gefa þeim eitthvað gott að borða.